Numbers 14

E Huriki a Israel Ri Longotaroa a Vure

1Na rodo iea e huriki lobo, ri tangi ri haloho. 2Ri deke ne Moses e Aron ri ta maea, “I kamumu hateka si gi mate o Egipto, o si gi mate koea na malala golea! 3I navai e BAKOVI DAGI i ngaru ni tuli lakea hita vona a robo karaba iea. Hita bara si lokovonga bara ri rabalaki hita na vabinga, ri bole e huriki e girihine hita, e tune hita, bara ri manga a vorakato ne ria. I kamumu si gi hamule lakea o Egipto.” 4Ri vata mule ne ria ri ta maea, “Si vulakia tara matakari ge bole mule hita lakea o Egipto.”

5Na tahuna ri ta maea, lakea e Moses e Aron ru lolu na matane huriki lobo. 6Lakea e Iosua e tune Nun, e Keleb e tune Iepune, ra turane huriki a ubu na tara nga ri kasisi e Kenan, ru rihate vona a ngava iea ru rape a varakia ne rua. 7Lakea ru taki e huriki a bakovi a ngatavine ru ta maea, “Ra malala mi laho polo vona i kamumu hateka. 8E BAKOVI DAGI ge vivi ne hita bara, i bole lakea hita vona malala iea i kamumu hateka ni varo a maki ni kani vona, bara i habia ne hita. 9 ^aNaha ni longotaro e BAKOVI DAGI, naha ni mangenge ne huriki ri made vona a robo iea, ria a maki tavula, bara si ratapile ria. E BAKOVI DAGI i made turane hita. I ratapile pali e huriki a vure taminga ta i matakari ria. Naha ni mangenge ne ria.”

10Pali e huriki a Israel i uka ma ri ngarua a ngavane Keleb. Lakea ri taki ta ri gi padi rua na kedo, ru gu mate. Ta ri gi rata mavonga, i malaviriri kunana e huriki ri masia a nipara dagi ne BAKOVI DAGI i para polomeli na Kape na Vaponga. Lakea i uka ma ri padi rua na kedo.

E Moses i Vasileki na Vure Ge Dodo e Huriki a Israel

11E BAKOVI DAGI i takia e Moses i ta maea, “Ge balaka riva e huriki nga ri gi longotaro iau? I uka ma ri luhoi tora iau. A rata a maka nivakasiri ri matai, pali i uka ma ri luhoi tora iau. 12Ngane ga rudua a gilanga dagi ge ratapile ria. Pali iau ga rata ioe, ge ioe a kabu dagi i gao hateka ne ria.”

13 ^bPali e Moses i koli i ta maea, “BAKOVI DAGI, na nitora vomu, o bole tala ria o Egipto e huriki o tuli valai ria koea. Ioe bara o ratapile ria, e huriki a Egipto bara ri longoa a velengana a naro o ratea ne ria. 14Bara ri vakalongo e huriki ri made vona ngane na robo iea. Re huriki nga ri longoa pali a velengamu o made turane mia, o bele kavakava na tahuna a bubu vomu i pesi langa na matana kape. O made na bubu na haro, na rodo o made na kanono o muga mia. 15Ioe bara o rabalaki palupu lobo e huriki a tara vomu, e huriki a tara ranga ri longoa a ramu i dagi, bara ri ta maea, 16‘E BAKOVI DAGI i keri ni tuli e huriki a tara vona ri gi lakea na robo i ta muholi vona hosi ta ge habia ne ria, lakea i rabalaki ria na tabeke i ngeki.’

17“Bakovi Dagi, a ngaru go vakasiri a nitora dagi vomu o ratea a maki o ta muholi vona go ratea. Ioe kunana o ta maea, 18 ^c‘Iau, e BAKOVI DAGI, i uka ma ge madihi malaviriri a hategu. A ngaru hateka e huriki, pali ga muri mai vakaroro a nitagu. A puga vuroki a naro hale na tagenga ne ria. Pali bara vakamadihi e huriki ri rata a naro hale, ge ramai a hamone ria, ge harena ne tamarane ria, e kukulimane ria.’ 19BAKOVI DAGI, ioe o ngaru mia lobo i uka ma o mapulo kilala. I mavonga a nana ioe go puga vuroki a naro hale ne huriki nga, i manga a hini o rata na tahuna ri pe e Egipto i valai i harena mona, o rata vakaroro i valai i harena mona.”

20E BAKOVI DAGI i longo a nitane Moses, i koli i ta maea, “A puga vuroki pali a naro hale ne ria i manga a hini o taki iau vona ga rata. 21 ^dIau a Vure mahuri, a nitora, a nipara nau i tabuli na tabeke lobo na malala. 22I muholi hateka e huriki a bakovi a ngatavine ri longotaro ri toha iau, i uka ma ri gi lakea na robo ta ga habia ne ria. Ri masia a nipara i vakasiri ria ne nau a made turane ria. Ri matai a maka nivakasiri a rata pali o Egipto a rata pali na tabeke i ngeki. Pali ri longotaro vakaroro a nitagu. 23I uka liu tara ne ria ge dili vona a robo iea a ta muholi vona, ta ga habia ne huriki a hamone mua. 24 ^ePali a vora nau e Keleb, a niluhoi vona i tebi, i ramaia a ningaru nau muholi. Ngane ga taparaki lokovongea vona a robo i masia pali, ge made vona, muri ge bolea e huriki a hamona. 25Ra robo iea e huriki a Amalek, a Kenan ri made na maloku vona. Kuduvi, mua lobo mu mariu tala mu hamule lakea na tabeke i ngeki, mu laho lokovonga na Dari Vururu.”

E Huriki a Israel Ni Ratapile

26E BAKOVI DAGI i taki e Moses e Aron i ta maea, 27“Balaka kupo e huriki a tara hale nga ri tapuhaki bala nau. A longo pali i tohai a kuligu vona a nitane ria. Garika ri gi voro taparaki a nitane ria? 28Ngane o taki ria vona a nitagu, a ta maea, ‘Iau e BAKOVI DAGI a made vakaroro a ta muholi ne mua, a longo mua pali mu taki ta mu gu mate iene, ngane ga rata manga a hini mu taki. 29 ^fNa tahuna mu mate, a podane mua bara ri tabuli viliha na tabeke i ngeki. Mu tapuhaki mu ta hateka nau. Ngane e huriki a bakovi ri tahoka a pida i ravulu rua i rike, i uka ma ri gi lakea vona a robo iea. 30A ta muholi ta ga bole mua, mu gu made vona a robo iea, pali ngane mua lobo i uka ma mu gu vano. E Keleb e tune Iepune, rua e Iosua e tune Nun kunana ru gu vano. 31Mu taki e huriki na robo iea, ta ri gi vaubi turane mua, ri gi rangi mua, ri gi bole e huriki e tune mua. Pali i uka. Iau bara taparaki e huriki a koma nga ri gi lakea na robo ra i uka ma mu ngarua, bara ri bolea ri made vakaroro vona. 32Pali mua i uka ma mu gu lokovonga, bara mu mate, mu bera na tabeke i ngeki iea. 33 ^gE huriki e tune mua bara ri laho viliha na tabeke i ngeki na pida i ravulu va, ge harena na tahuna mua lobo bara mu mate. Mu ha taro iau, mu manga a ngatavine i ha taro e girihina i ngoi viliha lae. Lakea e huriki a koma bara ri bole a maregoa na naro hale ne mua. 34Mu lakea vona a robo iea, mu masia na parava i ravulu va. Ngane bara mu bolea a maregoa na naro hale ne mua, ge harena na pida i ravulu va. A pida i taku ge bole a murina a parava i taku, ra mu kasisia a robo iea. Ra naro iea ge rata mua bara mu lohoka vona iau i uka ma ngarua a naro na tagenga ne mua.’ 35Iau, e BAKOVI DAGI, a ta muholi bara vakalobo e huriki a bakovi a ngatavine, ri tahoka a niluhoi i taku ni tagege ni ngalahere nau. Mua takutaku bara mu mate koea na tabeke i ngeki. Iau e BAKOVI DAGI a takia a ngava iea.”

36E huriki a bakovi e Moses i rudu ria ri gi kasisia a robo iea ri hamule, ri tami e huriki ri ta maea, “A robo iea i hale. Ra ngava iea kunana i rata e huriki ri deke ne BAKOVI DAGI.” Lakea e BAKOVI DAGI i ratea a gilanga dagi i bele ne huriki a bakovi nga, ri malaviriri kunana ri mate. 38E huriki a bakovi ri vano ri masia a robo iea, ri mate lobo. Pali e Keleb e tune Iepune, turana e Iosua e tune Nun kunana ru mahuri.

E Huriki a Israel Ri Vaubi o Kenan

(Vinara 1:41-46)

39E Moses i vakalongo lobo a nitane BAKOVI DAGI ne huriki a Israel, lakea ri tangi hateka. 40Na hatelanga pokopoko, na parava muri ri vano, ri sike na lolo. Ri taki mule ria, “Si rata pali a naro hale. Si vano, si gi dili na tanga e BAKOVI DAGI i ta muholi vona si gi bolea.”

41Pali e Moses i taki ria, i ta maea, “Naha ni vano. I navai mu gu tagege mu gu longotaro a nitane BAKOVI DAGI? Na tahuna bara mu lokovonga i uka ma mu gu rangi ria. 42Naha ni lokovonga, e huriki a pile bara ri rangi mua, a vuhuna e BAKOVI DAGI i uka ma i made turane mua. 43Na tahuna bara mu lokovonga, e huriki a Amalek a Kenan bara ri vaubi turane mua, ri rabalaki mua mu mate. E BAKOVI DAGI i uka ma ge pesi turane mua na vabinga, a vuhuna mu ngalahere vona i uka ma mu muri vona.”

44E Moses i taki ria vona a nita iea, pali i uka ma ri longototo. Ri malaga rike ri lakea na tanga na lolo. Pali e Moses i uka ma i vano turane ria, i made na mada. Re huriki nga i uka ma ri bolea a Tava na Ngava Dagi ne BAKOVI DAGI, i tabuli na mada. 45Muri e huriki a Amalek a Kenan ri pe a tanga ne ria na lolo ri puru valai, ri vaubi turane huriki a Israel ri rangi ria. Ri valili ne huriki a Israel i harena na tanga e Horma. ▼

▼(14:45)E ‘Horma’ na nita Hibru i manga a ‘vuranga.’